Landsvirkjun og Þeistareykir ehf. tilkynntu í lok maí að félögin myndu hraða rannsóknum á jarðhitasvæðum Bjarnarflags og Þeistareykja í sumar til að mæta aukinni eftirspurn orkukaupenda á svæðinu. Viðræður standa yfir við mögulega kaupendur á orku til iðnaðar á Norðausturlandi.
Umfang verkefnisins 120 mannár
Um er að ræða útboð á hönnun og gerð útboðsgagna vegna framkvæmda við allt
að 90 MW virkjun í Bjarnarflagi og 90 MW virkjun á Þeistareykjum ásamt aðstoð við eftirlit með uppsetningu véla- og rafbúnaðar.
Umfang verkefnisins er með stærra móti, um 120 mannár eða 220.000 vinnustundir.
Landsvirkjun og Þeistareykir ehf. vinna samhliða undirbúningi framkvæmda að leyfismálum vegna fyrirhugaðra virkjana. Landsvirkjun hyggst sækja um
virkjunarleyfi til Orkustofnunar fyrir 45 MW virkjun í Bjarnarflagi og Þeistareykir ehf. fyrir 90-100 MW virkjun á Þeistareykjum fyrir árslok 2011. Aðalskipulag
Þingeyjarsveitar hefur verið sent umhverfisráðherra til staðfestingar, auk þess sem sveitarstjórn Þingeyjarsveitar hefur til umfjöllunar og
afgreiðslu tilskilin leyfi fyrir undirbúningsframkvæmdum sumarsins .
Miðað við að tilskilin leyfi verði veitt er gert ráð fyrir að framkvæmdir hefjist við fyrra þrep Bjarnarflagsvirkjunar sumarið 2012 (45
MW) og að gangsetning fari fram í lok árs 2014. Gert er ráð fyrir að framkvæmdir hefjist við Þeistareykjavirkjun seinni hluta árs 2012 og
að fyrra þrep virkjunar (45 MW) verði gangsett um mitt ár 2015 en seinna þrepið (45 MW) á seinni hluta árs 2015. Framkvæmdaáætlunin
leitast við að tryggja sjálfbærni viðkomandi jarðhitasvæða.
Stofnkostnaður 47 milljarðar króna
Heildar stofnkostnaður þessara framkvæmda er áætlaður um 47 milljarðar króna. Áfallinn rannsóknar og undirbúningskostnaður er
nú um 5,4 milljarðar króna fyrir báðar virkjanirnar.
Mati á umhverfisáhrifum 90 MW virkjunar í Bjarnarflagi og 200 MW virkjunar á Þeistareykjum er lokið. Rannsóknarboranir hafa þegar tryggt næga
gufu fyrir 45 MW þrep á hvorum stað.
