Skipulagsstofnun hefur gefið álit sitt um mat á umhverfisáhrifum Þeistareykjavirkjunar. Jafnframt var gefið álit um Kröfluvirkjun II, háspennulínur frá Kröflu og Þeistareykjum, álver á Bakka við Húsavík og sameiginlegt mat á umhverfisáhrifum allra þessara fjögurra framkvæmda.
Með áliti Skipulagsstofnunar er mikilvægur áfangi að baki vegna mögulegrar nýtingar á háhitasvæðum norðaustanlands. Álitið samræmist stefnu Þeistareykja ehf, um að nýta orkulindir með sjálfbærum hætti til atvinnuuppbyggingar.
Þeistareykir ehf. lagði fram til mats á umhverfisáhrifum 200 MW virkjun á Þeistareykjum á þeim grunni að það væri aflgeta sem svæðin gætu staðið undir á sjálfbæran hátt. Afstaða þessi er grundvölluð á mati ÍSOR frá árinu 2009. Hins vegar er ljóst að endanleg vinnslugeta fæst ekki staðfest fyrr en fyrir liggur reynsla á nýtingu svæðanna.
Þeistareykir leggur áherslu á að fyrirtækið mun eingöngu semja um sölu á orku hverju sinni sem hægt er að tryggja afhendingu á. Vegna þessa er ljóst að virkjanirnar verða byggðar í áföngum, miðað við vitneskju um sjálfbæra nýtingu. Mikilvægt er að væntanlegir kaupendur séu meðvitaðir um þá óvissu sem fylgir orkuöflun á jarðhitasvæðum.
Næstu skref af hálfu Þeistareykja ehf. er að afla tilskilinna leyfa til að halda áfram rannsóknum á orkugetu svæðisins.
Skipulagsstofnun hefur gefið álit sitt um mat á umhverfisáhrifum Þeistareykjavirkjunnar,sjá hér.
Skipulagsstofnun hefur gefið álit sitt um mat á umhverfisáhrifum álvers á Bakka og tengdum orkuframkvæmdum, sjá hér.
